П.А. Ойуунускай төрөөбүтэ 130 сылынан Ылдьаа Нохуоккун аатынан Чараҥнааҕы култуура киинин иһинэн тыйаатыр устуудьуйата Ойуунускай «Ыраахтааҕы ыйааҕа» айымньытыгар испэктээги туруоран көрдөрүөҕэ.
Туруорааччы режиссер Екатерина Свинобоеваттан бу туһунан ааҕааччыларбытыгар сырдата түһэригэр ыҥырдым, онуоха маннык кэпсээтэ:
– l-кы Хоро нэһилиэгин тэрилтэлэрэ, уопсастыбаннай түмсүүлэрэ сыл устата «Улуу киһи суолунан» барылы үлэлэтэн түмүк киэһэтигэр чугаһаан эрэбит. Ылдьаа Нохуоккун аатынан Чараҥнааҕы култуура киинигэр үлэлиир «Манчаары» тыйаатыр устуудьуйата
Былатыан Ойуунускай төрөөбүт күнүгэр, о.э сэтинньи 11-с күнүгэр – Чараҥҥа, 14-с күнүгэр Бороҕоҥҥо икки оонньуулаах кэмиэдьийэтин көрдөрөөрү долгуйа сылдьабыт. Испэктээккэ Маргарита Крылова, Екатерина Захарова, Ирина Иванова, Александр Васильев, Афанасий Карамзин, Афанасий Копырин, Афанасий Константинов, Иван Окоемов, Вера Самсонова, Павел Охлопков, Степан Бурцев уонна оҕолор Сайаана Трофимова, Эрчим Корнилов кыттыыны ылыахтара. Кыттааччыларга сыанаҕа эрдэ тахсыбатах, тыйаатыр эйгэтин кытта саҥа билсиһэ сылдьар дьон бааллар, инньэ гынан долгуйуубут ордук күүстээх. Классика айымньы буолан сүрүн болҕомто тылга сытар.
Онон улуу суруйааччыбыт быраман дьылларга суруйан хаалларбыт айымньытын тилиннэрэн көрдөрөр түгэни мүччү туппакка, биир дойдулаахтарбыт испэктээк диэн уустук уонна умсугутуулаах оонньууга холонууларын көрүҥ, сыаналааҥ диэн ыҥырабыт.
Charan