Саха Өрөспүүбүлүкэтин култуураҕа уонна духуобунай сайдыытын министиэристибэтэ 2024 сылы култуура эйгэтигэр уонна оҕо иитиигэр үлэлиир тэрилтэлэргэ оҕо тыйаатырын үскүүстүбэтин сылынан биллэрбитэ. Онно анаан САССР үтүөлээх артыыһа, драматург Илья Иванович Находкин аат. Чараҥ култууратын киинэ көҕүлээн, улуус култуураҕа салалтата (сал. С.С. Нафанаилов), улуус үөрэҕириигэ салалтата (сал. С.М. Литвинцев) уонна “Бастакылар хамсааһыннара” (сал. М.П. Винокурова) өйөбүллэринэн оскуола тыйаатырдарыгар “Күөрэгэйдээх алааска” улуустааҕы көрүүнү тэрийэн ыытта.
Оскуола тыйаатырдара көрүүгэ киирбит биэс хайысхаттан түөрдүгэр үлэлэрин ыыттылар, олортон сүрүннээн “алын кээмэйдээх испэктээккэ” уонна “уус-уран ааҕыыга”. 16 оскуола тыйаатырдарыгар уонна Улуустааҕы оҕону эбии үөрэхтээһин киинин тыйаатыр үөрэҕэр барыта 193 оҕо хабыллан тэйиччиттэн кыттыыны ыллылар.
Дьүүллүүр сүбэҕэ үлэлээтилэр: Г.Р. Бережнев, улуустааҕы “Бастакылар хамсааһыннара” үлэһитэ, А.С. Васильев, Ылдьаа Нохуоккун аат. Чараҥ култууратын киинин художник-оформителэ, Е.П. Свинобоева, Ылдьаа Нохуоккун аат. Чараҥ култууратын киинин уус-уран салайааччыта, режиссера.
Кыайыылаахтарынан таҕыстылар:
“Алын кээмэйдээх испэктээк” хайысхатыгар.
“Чыпчаал кыайыылаах” – Суотту “Уһуйчаана” оскуола тыйаатыра, сал. Е.В. Портнягина, Б. Васильев “А зори здесь тихие” испэктээгэ. Кинилэргэ Улуус култуураҕа салалтатын анал бэлэҕэ ананна.
I үрдэл – Баатаҕайдааҕы оскуола тыйаатыра, сал. В.И. Сивцева, Суорун Омоллоон “Бэйэтэ эмтиэкэ” испэктээгэ.
II үрдэл – Чараҥнааҕы оскуола тыйаатыра, сал. М.С. Федосеева, “Киэһээҥҥи аһылык” испэктээгинэн.
III үрдэл – Суотту “Уһуйчаана” оскуола тыйаатыра, сал. Е.В. Портнягина, “Мөҕүрүүр Бөҕө” олоҥхо-испэктээгэ.
“Уус-уран ааҕыы” хайысхатыгар.
“Чыпчаал кыайыылаах” – Семен Портнягин Мүрүтээҕи “Уолан” гимназия 6 “б” кыл. үөрэнээччитэ, сал. Н.В. Бурцева, П.А. Ойуунускай “Өйдөөх оҕо” кэпсээнэ. Киниэхэ улуус үөрэҕириигэ салалтатын анал бэлэҕэ ананна.
I үрдэл – Мүрү № 2 орто оскуолата, сал. Н.И. Готовцева, Г.Н. Иванова-Айтыына “Олоҥхо дойдутун ыһыаҕа” олоҥхоттон быһа тардыы.
II үрдэл – Хоноҕор орто оскуолата, сал. М.В. Бурцева, П.А. Ойуунускай “Оҕо куйуурдуу турара” кэпсээнэ.
III үрдэл – Ньургустаан Копырин, Бээди орто оскуолатын 1 кыл. үөрэнээччитэ, сал. В.Г. Домотова, Т. Сметанин “Саллаат сүрэҕэ” хоһооно.
“Дьүһүйүү” хайысхаҕа “Чыпчаал кыайыылаах” – Тулуна орто оскуолатын 3-4 кыл. үөрэнээччилэрэ, сал. Т.И. Дягтерева, Е.Н. Дягтерева, Баал Хабырыыс “Сибэккилэр” дьүһүйүү буолла. Кинилэргэ култуура салалтатын анал бэлэҕэ ананна.
“Күлүк тыйаатыра” хайысхаҕа “Чыпчаал кыайыылаах” – улуустааҕы оҕону эбии үөрэхтээһинин киинин тыйаатыр үөрэҕэ Н. Якутскай “Дьүкээбил уота” испэктээгинэн таҕыста уонна Ылдьаа Нохуоккун аат. Чараҥ култууратын киинин анал бэлэҕэр тигистэ.
Билигин Арассыыйа бары оскуолаларыгар тыйаатырдар, устуудьуйалар аһыллан үлэлэрин саҕалаабыттара тыйаатыр үскүүстүбэтигэр улахан болҕомто ууруллар. Дьүүллүүр сүбэ “Күөрэгэйдээх алааска” көрүү түмүгүнэн улуус оскуолаларыгар анал үөрэхтээх дьон суоҕунан тыйаатыр эйгэтин үлэтэ намыһаҕын, билиҥҥи кэм оҕотугар сөптөөх репертуар суоҕун бэлиэтээтилэр. Оскуола тыйаатырдарын салайааччыларыгар үөрэхтээһин баар буолуохтааҕын тоһоҕолоотулар.
Тыйаатыр эйгэтэ оҕо эргиччи сайдыылаах, өй-санаа, тыл-өс өттүнэн баай, сиппит-хоппут киһи буолан тахсарыгар үтүө сабыдыаллааҕын өйдөөн, бастакынан ыытыллыбыт “Күөрэгэйдээх алааска” көрүүгэ кыттыыны ылбыт бары оскуола тыйаатырдарыгар, салайааччыларга истиҥ махталбытын тиэрдэбит.