Чараҥнар аһымал кэнсиэр тэрийдилэр

Кулун тутар 20 күнүгэр Ылдьаа Нохуоккун аатынан Чараҥ култуура киинин сыанатыгар «Алтан кыл» айар устуудьуйа аһымал аахсыйа кэнсиэри көрдөрдүбүт.
«Алтан кыл» салайааччыта Гаврил Николаевич бииргэ үөрэммит доҕоро, Майаҕас олохтооҕо
Копырин Савва Николаевич эмтэнэригэр көмөлөһөр соруктаах ыытылынна. Кэнсиэргэ устуудьуйа улахан дьонун уонна оҕо-ыччат ырыа, тыыннаах доҕуһуол бөлөхтөрө, «Күбэйэ» ырыа бөлөҕө (сал. А.Н. Свинобоева), «Дьирибинэ» көр-күлүү бөлөҕө (сал. А.С. Васильев), ырыаһыттар: Николай Бурцев, Снежана Охлопкова, Туяра Румянцева, Юрий Сторожев, Петр Копырин, Павел Охлопков уо.д.а кыттыыны ыллылар.
Аһымал аахсыйа кэнсиэри Майаҕас олохтоохторо, С.Н. Копырин бииргэ төрөөбүттэрэ, аймахтара, бииргэ үөрэммит оҕолоро, өрөспүүбүлүкэтээҕи 1983 сыллаах оскуоланы бүтэрбиттэр түмсүүлэрэ кэлэн көрдүлэр, махтал тылларын эттилэр.
Киирбит үбү Савва Николаевич бииргэ төрөөбүт быраатыгар Константин Николаевичка туттардыбыт.
Савва Николаевич ыарахан ыарыыттан босхолонон этэҥҥэ эмтэнэн кэлэригэр этиллибит үтүө санаалар, алгыс тыллар туолалларыгар баҕарабыт уонна эрэнэбит!

Уус-уран салайааччы Екатерина Свинобоева