Суугунай Чараана биһирэмнээх дьоро киэһээтэ хатыҥ чараҥынан дьирбиилэммит Чараҥ бөһүөлэгэр дьоро киэһэ буолла.
Хомоҕой тыллаах хоһоонньут, суруналыыс, суруйааччы Светлана Бурцева — Суугунай Чараана саҥа кинигэлэрин сүрэхтэниитэ, СӨ суруйааччыларын Сойууһун чилиэнинэн киирбит үөрүүтүн биһирэмэ буолла.
Үтүө тэрээһини режиссер Екатерина Свинобоева бэрт сэргэхтик салайан ыытта.
Кэрэ киэһэ I Хоро нэһилиэгин өрөгөйүн ырыатынан саҕаланна. Ырыа тылын Светлана Михайловна суруйбут, матыыбын биллэр музыкант Гаврил Свинобоев — Гайаат айбыт.
Салгыы улуус баһылыгын солбуйааччы Анатолий Сторожев, Мүрү нэһилиэгин баһылыгын солбуйааччы Вероника Сивцева, үөрэх управление тын салайааччытын солбуйааччы Тимофей Григорьев эҕэрдэлээтилэр.
Тэрээһин бэлиэ түгэнинэн олох ыарын билбит сокуоннай саастарын ситэ илик оҕолору реабилитациялыыр улуустааҕы киин үлэһиттэрэ Суугунай Чараана суруйбут «Көмүлүөк иннигэр» инсценировкатын, «Отчуттар» дьүһүйүүнү туруорбуттара буолла.
Айар эйгэтин, суруйааччылар ааттарыттан СӨ суруйааччыларын Сойууһун бырабылыанньатын чилиэнэ Акулина Иванова — Бээрийэ кыыһа Хотойук Айгыына, Саха сирин суруйааччыларын Сойууһун чилиэннэрэ, «Саха сирэ» хаһыат суруналыыстара Надежда Егорова — Намылы, Анивера Акимова эҕэрдэлээтилэр. Айгыына Суугунай Чараана хоһооннорун дириҥник ырытта.
Ырыа, хоһоон дьүрүскэнэ кутуллар кэрэ киэһэ Нэлээн чараҥын суугуна биллэргэ дылы буолла. «Уһуктуу» хоһоон куттаахтар түмсүүлэрэ ол кэрэни уһугуннарда. Бу нуурал киэһэҕэ Чараҥ бөһүөлэгэр хатыҥ чараҥ суугуна күүлэйдээтэ.
