Кыайыы холбуката
Муус устар 26 күнүгэр Чараҥ коллекционердарын «Сайдыс» түмсүүтэ (салайааччылар К.Г. Бурцева, С.С. Бурцева) Ылдьаа Нохуоккун аат. култуура киинигэр Саха Өрөспүүбүлүкэтин күнүгэр анаан ыытар үгэскэ киирбит ахтыы тэрээһини тэрийдилэр. Быйылгы быыстапка Улуу Кыайыы 80 сылыгар ананан «Кыайыы холбуката» диэн ааттанан сэрии ыар тыынын билбит дьоммутугар ананна. Коллекционердар бэйэлэрин мунньууларыттан Аҕа дойду Улуу сэриитигэр сыһыаннаах экспонаттарын көрдөрүүгэ туруоран, ол ааспыт саҕахтары арыйдылар уонна ону сэргэ Улуу Кыайыыны уһансыбыт дьоннорун олохторун кэпсиир докумуоннары, мэтээллэри, маллары холбукаҕа-чемодаҥҥа уган аҕалан ахтан-санаан, ааттарын ааттаан, кэриэстээн аастылар. Бу тэрээһиҥҥэ уруккута биир историялаах Хоро нэһилиэгиттэн «Абылаҥ» коллекционердар түмсүүлэрэ кыттыыны ыллылар. Кинилэртэн Афанасий Бурцев-Оҕустаах Оҕонньор саха оҕуһа саха киһитин олоҕор диэн тыыл олоҕун туһунан чахчылаах кэпсээнэ кэлбит дьону долгутта. Манна кэлбит хас биирдии киһиэхэ бэйэтин хаан-уруу дьонун үйэтитэр кыаҕы үөскэппит «Кыайыы холбуката» тэрээһин ураты тыыннаахтык ааста. Сэрии кэминээҕи ырыалары — Гаврил Свинобоев, Петр Копырин, Туйаара Румянцева, Снежана Охлопкова ыллаатылар, Афанасий Бурцев хоһооннору ааҕан көрөөччүлэргэ анаатылар.
