Саха киһитэ – төрүт айылгытынан удьуор утум үлэһит буолар. Кини хорсун санаатын кыаҕынан, чэрдээх илиитин күүһүнэн уйгулаах олоҕу уһансар, дьоллоох олоҕу тутар.
Кулун тутар 25 күнүгэр биһиги нэһилиэкпитигэр – ураты күн буолан ааста. Саха сирин хоролорун төрүт өбүгэтэ Улуу Хоро сөбүлээн тохтообут сиригэр, аарыгырбыт Тойон Мүрү алаас маанылаах куулатыгар, 1-кы Хоро нэһилиэгин олохтоохторо Саха сирин бастакы Үлэ Дьоруойдарыттан биирдэстэрэ, Уус Алдан улууһун аан бастакы Үлэ Дьоруойа Данил Гаврильевич Бурцев-Тайыла аатын үйэтитэр искибиэргэ Саха Өрөспүүбүлүкэтин ытык киһитин, Үлэ Албан аатын уордьанын толору кавалерын, Арассыыйа Федерациятын Үлэтин Дьоруойун Михаил Николаевич Готовцевы кытта көрсүһүү буолла. Тэрээһиҥҥэ: Чараҥ Далбар Хотуттара саха сиэринэн арыылаах алаадьынан, уохтаах кымыһынан айах тутан күндүлээтилэр, РФ Үлэтин Дьоруойа М. Н. Готовцев төрөөбүтэ 80 сааһынан истиҥ эҕэрдэлэр этилиннилэр, Уус Алдан улууһун бастакы Үлэ Дьоруойа Д. Г. Бурцев албан аатыгар сүгүрүйүү бэлиэтигэр кыһыл сибэкки дьөрбөтүн уурдулар.
Бу икки Үлэ Дьоруойдарын күттүөннээх олохторо, Данил Гаврильевич Бурцев уонна Михаил Николаевич Готовцев албан ааттара өрүү ахтыллан, өрө тутуллан ааттанныннар!
Үлэ дьонноругар – Уруй олохтонно!
Дьиҥнээх Дьоруойдарга – Айхал ананна!
