1-кы Хоро нэһилиэгэр бу дьыл алтынньы 7 күнүгэр Ылдьа Нохуоккун аатынан сынньалан киинигэр, Евдокия Степановна Бурцева, СӨ доруобуйа харыстабылыгар туйгуна саҥа, сонун кинигэтэ сүрэхтэннэ.
Кинигэ Улуу Кыайыы 80 сылыгар, Үлэ Геройа Данил Гаврильевич Бурцев – Тайыла төрөөбүтэ 125 сыллаах үбүлүөйүгэр ананар. Кинигэ кэлэр кэнчээри ыччакка ананан бу дьыл ыам ыйыгар «Мүрү Саһарҕата» редакцияҕа бэчээттэнэн таҕыста.
Евдокия Степановна Бурцева Аҕа Дойду Улуу сэриитигэр кыттыбыт, тыылга үлэлээбит, дойдубут сэрии кэнниттэн чөлүгэр түһэригэр бэйэлэрин харыстаммакка күннэри-түүннэри сайдыылаах олох кэлэрин туһугар үлэлээбит дьоммутун үйэтитэн, көлүөнэ билиитигэр таһаарар сыаллаах бу кинигэни хомуйан оҥорбутун срурйар.
Бу үөрүүлээх күҥҥэ ааптар чугас дьоно, доҕотторо, тэрилтэ салайааччылара, Буурсап уулусса олохтоохтор истиҥ эҕэрдэ тылларын анаатылар. Уруккуну-хойуккуну санаһан үөрүүтүн тэҥҥэ үллэстэллэрин биллэрдилэр.
Кинигэ – историяны үйэттэн үйэҕэ тиэрдэр, көлүөнэлэри ситимниир, үйэтитии биир бэлиэтэ буолар. Биһиги нэһилиэкпит дьонун-сэргэтин, туһунан суруллубут кинигэлэр сыллата элбээн иһэллэрэ олус үөрүүлээх.
Буурсап уулусса олохтоохторун ааттарын, историятын үйэтиппит Евдокия Степановнаҕа махталбытын биллэрэбит, тус бэйэҕэр, чугас дьоҥҥор дьолу-соргуну, айымньылах үлэни баҕарабыт. Эдэр көлүөнэ ыччаты киһи быһыытынан сайдарыгар, сиэрдээх буолуутугар, төрөөбүт дойдутун историятын чинчийэригэр көҕүлүү тураргар.
К.А. Неустроева аат. олохтоох библиотека сэбиэдиссэйэ
Бурцева Лия Степановна Чараҥ, 2025с.
