Балаҕан ыйын 28 күнэ. Быйыл 2025 сылга Ылдьаа Нохуоккун аат. Чараҥнааҕы култуура уораҕайа 63-с сылын ырыалаах-тойуктаах, үҥкүүлээх-битиилээх, көрдөөх-нардаах үлэтин саҕалыыр, 63-с сылын эһиги ытыскыт тыаһыгар быыһын арыйда.
Ылдьаа Нохуоккун аат. Чараҥ култууратын дьиэтэ-кулууп 1962 с. биһиги эһэлэрбит, аҕаларбыт түмсүүлээх, көхтөөх, күүстээх үлэлэрин түмүгүнэн тутуллан үлэҕэ киирбитэ. Бу сыл түһэриллибит акылааты 22 сыл устата тутан, бу мин турар, эһиги олорор салҕааһыны сылтан сыл ситэрэн 1984 с. үөрүүлээх быһыыга-майгыга арыйбыттара. Ол кэмҥэ, күндү доҕоттор, Чараҥҥа эрэ буолбакка, улууска бастакынан быыһы арыйар-сабар, киинэ экранын түһэрэр-таһаарар механизм үлэлээн бар дьону сөхтөрбүтэ, үөрдүбүтэ. Ол быыс-экран механизмнара күн бүгүн 41 сыл устата тохтообокко үлэлииринэн, маны айбыт-оҥорбут рационализатор киһибитигэр, сэбиэскэй кэминээҕи нэһилиэк историятын, дьонун-сэргэтин кэпсии сылдьар ытык кырдьаҕаспытыгар, “1-кы Хоро нэһилиэгин” төрүттээбит, нэһилиэкпит бастакы баһылыгар Михаил Дмитриевич Орловка махтанан ытыспыт тыаһын аныахха диэн ыҥырабын. Бу маннык ураты дьоҕурдаах дьон биһиги Чараҥмытыгар түөлбэлээн олороллоруттан биһиги наһаа астынабыт, киэн туттабыт.
2000 сыллар саҕаланыыларыгар бэйэни салайыныы саҥа олоххо киириитэ, үп-харчы кырыымчыга тэбэн бу уораҕай урут тутуллубут өттүн көтүрэн, билиҥҥи быһыытын хаалларбыттара. Култуурабыт уораҕайын чөлүгэр түһэрии үлэлэр бүтэһигин 2017 с. ыытыллыбыттара. Онно дьиэни тоҥорон туран, ититиигэ көрүллүбүт харчыны хаһаанан, онон үбүлэнэн буолбатах улахан өрөмүөн оҥоһуллубута.
Быйылгы дьиэбит ис бараанын чөлүгэр түһэриигэ үбүлээһини, көмөнү оҥордулар:
- “1-кы Хоро нэһилиэгин” дьаһалтата – 254 224 солк. харчыны көрбүтэ. (зал уота, апс, түннүк)
- “РОСТ” топливно-транспортнай хампаанньа хааччахтаммыт тэрилтэ генеральнай дириэктэрэ Платонов Анатолий Викторович – 300 тыһ. үбүлээһини оҥордо.
- Екатерина, Гаврил Свинобоевтар дьиэ кэргэн – 63 350 солк. үбүлээтилэр.
- Урбаанньыт Бурцев Семен Петрович – куораттан мал-сал кэлиитин толору уйунна.
- “Мебель Уус Алдан” мастер Сторожев Юрий Михайлович – тыаһы-ууһу таҥааччы, уоту холбооччу остуолун оҥорон бэлэх уунна.
- Алексеева Марфа Ивановна – түннүк сабыыларын босхо тигэн күүс-көмө буолла.
- Маны таһынан “Мебельнай” маҕаһыын тутуу материалын иэс биэрэн чөлүгэр түһэрии үлэ-хамнас тохтоло суох барарын ситистэ.
Маннык үлэлэр ыытылыннылар: - “Мониторинг” хааччахтаммыт тэрилтэ баһаартан сэрэхтээх буолууга бэйэтэ холбонон иһитиннэрэр тыас систематын толору уларытта.
- Бу тэрилтэ көрөөччү саалатын уотун толору уларытан туттарда.
- Дьокуускайга урбаанньыт Ньургустаан Иванович Ивановка 8 евро түннүктэри оҥотторон туруордубут.
- Көрөөччү саалатын муостатын толору ковролинынан тэлгээтибит, итиини тутар материалы анныгар уктубут.
- 3 хос – киирии фойе, коридор, гримернай муосталарын үрдэттибит, тэҥнээтибит.
- 5 хос – киирии фойе, фойе, коридор, кабинет, гримернай муосталарын линолеумунан тэлгээтибит, итиини туттун диэн полестеролу, осбыны анныгар уктубут.
- 5 хос эркиннэрэ эргиччи, түннүктэр наличниктарын саҥаттан кырааскаланнылар.
- Параднай киириигэ саҥа аанын туруордубут.
- Быыстары-арыттары көрдөөн пенанан ыстардыбыт, базальынан бүөлээтибит.
- Көрөөччү кириэһилэтин табыгастаахтык көннөрдүбүт.
- “ЖКХ Альтернатива” хааччахтаммыт тэрилтэ киин ититии турбаларын, батарыайаларын ыраастаатылар, сайҕаатылар.
«Саҥа Тыын» аахсыйа кэнсиэркэ саха эстрадатын сулустара Дьокуускайтан Бүөккэ Бөтүрүөп, Герасим Павлов-Дьарааһын, Дмитрий Готовцев, Айаал Кириллин-Күндэл, Святослав Эверстов, Мэҥэ Хаҥаластан Николай Васильев-Айтамыл кыттыыны ыллылар, ырыаларын бэлэхтээтилэр.
