Муус устар 11 күнүгэр “Улуус дьахталлара – үйэлэр үктэллэригэр” диэн ааттаах улуус дьахталларын хамсааһынын 100 сыллаах үөрүүлээх форума Бороҕоҥҥо Күлүмнүүр аатынан култуура дыбарыаһыгар ыытылынна. Тэрээһин бэлиэ даатаны көрсө улуус дьахталларын хамсааһынын 100 сыллааҕы үлэтин-хамнаһын сырдатар кинигэ сүрэхтэниитигэр Ылдьаа Нохуоккун аат. Чараҥ култууратын киинин уус-уран салайааччыта Екатерина Свинобоева суруйуутугар уонна туруоруутугар “Улууспут дьахталлара инники күөҥҥэ” театрализованнай көстүүтүнэн саҕаланна. Көстүүгэ ыраахтааҕы саҕана дьахтар ыар олоҕуттан саҕалаан өрөбөлүүссүйэ кэлиититтэн күн бүгүҥҥэ диэри саха дьахтарын олоҕо уонна Саха сиригэр дьахталлар хамсааһыннарыгар инники күөҥҥэ сылдьыбыт улууспут дьахталлара сырдатыллан, тыыннаҕымсытан көһүннүлэр.
