Кулун тутар 20 күнүгэр В.Н. Мигалкин аатынан Чараҥ орто оскуолата үгэскэ киирбит “Мигалкинскай ааҕыылар” (Мигалкинские чтения) киэҥ ис хоһоонноох тэрээһин буолан ааста. Бу ааҕыылар Уус Алдан улууһугар пионерскай хамсааһыны төрүттээбит, бастакы пионерскай лааҕыр тэрийээччитэ, учуутал Василий Николаевич Мигалкин уонна кини уолаттара: Саха сирин биллиилээх судаарыстыбаннай уонна уопсастыбаннай диэйэтэлэ, Арассыыйа Федерациятын Монголияҕа (Эрдэнэт куоракка) Генеральнай консулунан үлэлээбит дипломат Александр Васильевич уонна Саха Өрөспүүбүлүкэтин норуоднай бэйээтэ Иван Васильевич Мигалкиннар сырдык кэриэстэригэр ананар үгэс буолбут тэрээһин буолар. Быйыл Ылдьаа Нохуоккун аат. Чараҥ култууратын киинигэр “Оҕо этим – отон этим” Иван Мигалкин хоһооннорунан, оҕолорго анаммыт айымньыларынан уус-уран ааҕыы күрэҕэ буолан ааста. Күрэххэ улуус 11 нэһилиэгин оскуолаларыттан 72 оҕо кыттыыны ылла
