Ханнык баҕар киһи, иллэҥ кэмигэр туох эмэ дьарыктаах буоллаҕына, олоххо тардыһыыта, дьулуһуута күүһүрэр, уратыланар.
Коллекция — киһи бэйэтин билиитин, өйүн-санаатын сайыннарар дьарык буолар, кини кэрэхсэтэрэ элбэх. Кинини өссө дириҥэтэн эттэххэ, бу аҥардас бэйэни эрэ сайыннарыы буолбакка, ону ааһан тулалыыр дьону-сэргэни кэрэ эйгэҕэ сыһыарыы буолар. Киһи коллецияны бэйэтин олоҕун эстетическай-култуурунай өттүнэн байытаары уонна сайыннараары мунньар.
Ахсынньы 16 күнүгэр Ылдьаа Нохуоккун аат. Чараҥ култууратын киинигэр Чараҥнааҕы «Сайдыс» уонна Мындаабатааҕы «Мус-тал» коллекционердар түмсүүлэрэ Саҥа дьыллааҕы көрсүһүүлэрэ буолан ааста. «Сайдыс» түмсүү быйыл тэриллибитэ 20 сылын туолбутун, бу түмсүү тэриллэригэр СӨ норуодунай бэйээтэ И.В. Мигалкин төһүү күүс буолбутун, ааспыт кэминээҕи кыттыылаахтарын, үлэтин-хамнаһын, ситиһиитин туһунан бастакы салайааччыта РФ үөрэҕириитин, СӨ култууратын туйгуна К.Г. Бурцева сырдатта. Мындаабатааҕы «Мус-тал» түмсүү салайааччыта Г.В. Чаптыкова ураты дьарыктаах дьонун-сэргэтин, коллекцияларын туһунан иһитиннэрдэ. Тэрээһиҥҥэ кэлбит хас биирдии коллекционер хаһааҥҥыттан үлүһүйэн, санаатын ууран, ирдэһэн көрдүүрүн, мунньарын, бэрийэрин, кичэйэн уурарын, харайарын туһунан кэпсээтилэр, билиһиннэрдилэр, хардарыта санаа атастастылар, атыыны-тутууну тэрийдилэр.
«Коллекционер киһи наһаа үөрүнньэҥ. Кини кыраттан да үөрэр — биир значогу, эбэтэр маарканы буллаҕына, үөрэр — биир санаалааҕын көрүстэҕинэ, санаатын үллэһиннэҕинэ» диэн тылларынан тэрээһини түмүтээтэ Чараҥнааҕы «Сайдыс» түмсүү саҥа салайааччыта Лия Степановна Бурцева уонна Иван Мигалкин 1993 с. суруйбут «Коллекционер доҕорум» хоһоонун ааҕан иһитиннэрдэ.
Коллекционер доҕорум,
Дууһаҥ эйиэнэ ыраас,
Сыһыаныҥ эмиэ мэлдьи сылаас,
Сүрэххэр сандаардын — саас!
Баҕа санааҥ эйиэнэ элбэх —
Кытаат, олоххо киллэр, эр сүрэх!
Кыбыстыыны дуол тумнан
Кэрэни эрэ тарҕатыс,
Коллекцияҕын байытан
Киһи ахсын үөрүүнү үксэтис.
Баай дуол, дууһаҕынан,
Барҕа буол, санааҕынан…
Просим Вас оценить работу нашей организации, пройдя по
ссылке: https://forms.mkrf.ru/e/2579/xTPLeBU7/?ap_orgcode=150160460
