Бэс ыйын 15 күнүгэр Чараҥ биир кэрэ туонатыгар Нэлээн хатыҥ чараҥар Саха Сирин бастакы Үлэ Дьоруойдарыттан биирдэстэрэ Данил Гаврильевич Бурцев төрөөбүтэ 125 сылыгар анаан “Үлэнэн салаллар саргы” улуустааҕы ыһыах буолан ааста. Ыһыах күн сарсыарда 10 чаастан Үлэ Дьоруойун Д.Г. Бурцев аатын уһун сылларга ааттатар, кини сырдык аатыгар сүгүрүйүү бэлиэтэ-сквер үөрүүлээх быһыыга-майгыга арылынна, кыһыл сибэкки дьөрбөтө уурулунна.
Ыһыах көрүн-нарын күөдьүтэн, ырыатын-тойугун диэлитэн төрүкү ыытар үгэскэ киирбит күөн-күрэстэрбитин, күрэхтэһиилэрбитин тэрийэн күрэх күөнүн күөттээн доҕору-атаһы тоҕуоруттубут, аймаҕы-хааны чуоҕуттубут. Ол курдук, норуот тылынан уус-уран айымньытын: олоҥхону, үгэни, норуот ырыатын, чабырҕаҕы толорууга, оһуохайы этиигэ “Ситим”, тыа сирин төрүт дьарыгын сөргүтүүгэ “Үүттээх Маҥааччыйа”, өбүгэлэрбит уол оҕону үлэҕэ үөрэтэр төрүт оонньууларыгар “Күн таҕыста!”, Сэмэнньэ Уус аатын үйэтитиигэ ыытыллар эр дьон мас уустарын “Уран Уус” уонна Арассыыйа Худуоһунньуктарын сойууһун чилиэнэ, «Лоскутная мозаика России» Бүтүн Арассыыйатааҕы бэстибээл 2 төгүллээх лауреата, Уус Алдан улууһун уонна Мүрү нэһилиэгин Ытык олохтооҕо, Саха Өрөспүүбүлүкэтин Норуотун маастара Атласова Мария Семёновна — Иис Маарыйа бырайыагынан “Саха талба-мааны таҥаһа” күөн-күрэстэр ыытылыннылар.
Арассыыйаҕа «ДЬИЭ КЭРГЭН», Саха Өрөспүүбүлүкэтигэр «ОҔО СААС», Уус-Алдан улууһугар «АҔА» сылларынан, Уус-Алдан улууһугар библиотека тэриллибитэ 100 сылынан «ДЬИЭ КЭРГЭН — ОЛОХ ТӨРДӨ» нэһилиэктэр икки ардыларыгар быыстапка уонна уус-уран самодеятельность көрүү-фестивальга II миэстэ ылан 150 000 солкуобай харчынан бириэмийэлэннибит.
Нэһилиэкпит бары олохтоохторугар көхтөөх кыттыыгыт иһин барҕа махтал!
Аламай күммүт арҕаа түһүүтэ култуурабыт киинигэр “Алтан Кыл” айар устуудьуйа “Сылаас тыын” тыыннаах доҕуһуолунан ырыа киэһэтин ыһыах дьонугар анаабыта.
