Сэтинньи 6 күнүгэр 1-кы Хоро нэһилиэгин Ылдьаа Нохуоккун аат. култуура киинигэр олохтоох коллекционердар «Сайдыс» түмсүүлэрэ нэһилиэкпитин кытта тэҥҥэ тэриллибитэ 20 сылыгар анаан «АБЫЛАҤ ТҮҺҮЛГЭТЭ» тэрээһин-быыстапкалара буолан ааста. Түмсүүнү саҕалаабыт, төрүттээбит РСФСР үөрэҕириитин уонна СӨ култууратын туйгуна К.Г. Бурцева «Сайдыс» ураты дьарыктаах дьонун-сэргэтин, ааспыт-билиҥҥи кэминээҕи үлэтин-хамнаһын, ситиһиитин сиһилии кэпсээтэ. «Сайдыстар» уһун сылларга абылаҥнаах дьарыктарын бырахпакка күн бүгүн илдьэ сылдьан араас таһымнаах быыстапкалары туруоран, араас хайысхалаах тэрээһиннэри тэрийэн култуура киинин үлэтигэр төһүү күүс буолаллар, улуус, өрөспүүбүлүкэ таһымыгар таһааран нэһилиэкпитин ааттаталлар. Бүгүн хас биирдиилэрэ саҥа коллекцияларын аҕалан көрдөрүүгэ туруордулар, билиһиннэрдилэр. Түмүккэ К.Г. Бурцева түмсүүнү салгыы салайан үлэлэтэригэр Бурцева Л.С. үлэтин туттарда, ситиһиини баҕарда. «Сайдыс» кыттыылаахтарын олохтоох дьаһалтаттан В.В. Гуляев, Ылдьаа Нохуоккун аат. киин салайааччыта Г.Н. Свинобоев, олохтоох «Ытык Сүбэ» салайааччыта С.И. Бочкарева эҕэрдэлээтилэр, бэлэхтэрин туттардылар. Нэһилиэк түмсүүлэриттэн биир инники күөҥҥэ сылдьар «Сайдыстарга» билиигитин-көрүүгүтүн, өйгүтүн-санааҕытын бар дьоннуун үллэстэн мэлдьи киэн туттуубут буола тураргытыгар баҕарабыт. Ылдьаа Нохуоккун аат. култуура киинин үлэһиттэрэ
