Муус устар 27 күнүгэр Чараҥ успуорт саалатыгар (сал. А.А. Гоголев) 1-кы Хоро нэһилиэгин бэтэрээннэрин сэбиэтэ (сал. С.И. Бочкарева) пенсионердарга нэһилиэк бэтэрээннэрин хамаандатын сүүмэрдиир күрэхтэһиини тэрийдилэр. Күрэхтэһии кырдьары билиммэт, успуорту таптыыр бэтэрээннэр сэлэлээн хааман-параадтаан киириилэринэн саҕаланна. Параады СӨ үөрэҕириитин, физическэй култууратын бэтэрээнэ, СӨ үөрэҕириитин туйгуна, «СӨ ытык саас» бэлиэ тустааҕа Вера Михайловна Бурцева салайан киллэрдэ. Аҕам саастаах көлүөнэ дьонун нэһилиэк баһылыгын солбуйааччы В.В. Гуляев, Чараҥ ыччатын «Сарыал» бөлөҕө үҥкүүнэн, Ылдьаа Нохуоккун аат. култуура киинин үлэһиттэрэ ырыаларынан эҕэрдэлээтилэр. Күрэхтэһии 7 көрүҥҥэ — буулдьанан ытыыга, дартска, дуобакка, саахымакка, остуол тенниһигэр уонна хабылыкка, хаамыскаҕа ыытыллан, тыҥааһыннаах киирсиилэр буоллулар. Кинилэртэн успуорт бэтэрээннэрэ: дьахталларга — Митрофанова Антонина Афанасьевна 6 көрүҥҥэ кыттан биэһигэр кыһыл көмүс уонна биир үрүҥ көмүс мэтээллэри, эр дьоҥҥо — Гуляев Григорий Дмитриевич икки кыһыл көмүс, икки үрүҥ көмүс мэттээллэри ылары ситистилэр. Буулдьанан ытыы чемпиона Скрыбыкин Александр Николаевич анал бирииһин кыайыылаах Алексеев Иван Ивановичка туттарда. Күрэхтэһии түмүгүнэн бары кыайыылаахтар мэтээллэринэн наҕараадаланнылар, кэлэр кэмнэргэ нэһилиэк аатын көмүскүүр кыаҕы ыллылар.
