Чараҥ бөһүөлэгэр Илья Находкин аатынан сынньалаҥ киинигэр улуус оскуолаларын ортолоругар Улуу Кыайыы 80 сылыгар анаммыт «Күөрэгэйдээх алааска» II күрэс буолан ааста. Манна улууспут 14 оскуолатыттан уонна эбии үөрэхтээһин кииниттэн барыта 120 оҕо кытынна.
Оҕолор видеоҕа устан ыыппыт үлэлэрин уонна сыанаҕа оонньоон көрдөрбүт театральнай туруорууларын, холбоон 18 үлэни күрэс тэрийээччитэ, сынньалаҥ киин уус-уран салайааччыта, режиссер Екатерина Свинобоева, «Навигаторы детства» улуустааҕы хамсааһын куратора Мария Винокурова, В.В. Никифоров-Күлүмүүр аатынан култуура дьиэтин режиссера София Сидорова сыаналаатылар.
Күрэс түмүгүнэн «Саллаат оҕото Чооруона» (И.Г. Иванов – Уйбаан Нуолур) айымньытыгар испэктээги туруорбут Лөгөйдөөҕү лицей-интернат үөрэнээччилэрин «Сайдам» устуудьуйата (сал. иитэр үлэҕэ дириэктэр сүбэһитэ Татьяна Петухова) Гран-при үрдүк ааты сүктэ. Манна Чооруона оруолун толорбут 7-с кылаас үөрэнээччитэ Дима Нафанаилов «Эр киһи бастыҥ оруола» анал аатынан биһирэннэ. Театральнай туруорууларга бу айымньыны өссө Найахы, Баатаҕай оскуолатын үөрэнээччилэрэ талбыттар. Бэлиэтээн эттэххэ, «Сайдам» устуудьуйа ааспыт ыйга «Навигаторы детства» тэрийбит тыйаатыр кэллэктииптэрин көрүү республикатааҕы күрэһигэр эмиэ муҥутуур кыайыылаах буолбута. Оттон I ст. лауреат аатын Хоноҕор орто оскуолатын кэлэктиибэ (сал. Марианна Бурцева) ылла. Кинилэр туруорууларыгар бүтүн оскуола кыттыбыта уонна эдэр артыыстар оруолларын олус итэҕэтиилээхтик оонньоон көрдөрбүттэрэ дьүүллүүр сүбэ кутун тутта. Дьүүллүүр сүбэ II ст. лауреатынан Бороҕоннооҕу оҕо ускуустубатын оскуолатын филиалын – Танда орто оскуолатын кэлэктиибин (сал. Анна Попова) билиннэ. Кинилэр Аҕа дойду сэриитин кэмигэр Малгиннар дьиэ кэргэн ыар дьылҕаларын олус уйаннык көрдөрдүлэр. Ийэ оруолун толорбут 10-с кылаас үөрэнээччитэ Катя Слепцова «Дьахтар бастыҥ оруола» анал аатынан бэлиэтэннэ. Оттон «Тиит буолбут саллааттар» айымньыны туруорбут Чараҥ орто оскуолата (сал. Марианна Федосеева) III ст. лауреат аатын ситистэ. Ону тэҥэ анал ааттары «Бастыҥ ааҕааччы» – Клава Гуляева (Уһун Күөл), «Бастыҥ сюжет» – Хомустаах орто оскуолата, «Бастыҥ музыкальнай композиция» – Бээрийэ орто оскуолата, «Уус-уран ааҕыы» – Сахаян Аргунов (Майаҕас) ыллылар. Күрэс сүрүн спонсордарынан үөрэх уонна култуура салалтатын өйөбүлүнэн улуус дьаһалтатын Ыччат уонна дьиэ кэргэн политикатын салалтата (сал. Валентина Андросова, Айал Степанов) буоллуллар.
Түмүккэ күрэс туһунан Екатерина Свинобоева: «Оскуола тыйаатырдарын күрэһэ оҕо айар дьоҕурун сайыннарар, дьон иннигэр саҥарар-иҥэрэр сатабылы иҥэрэр, хамаанданан үлэ тыынын күүһүрдэр олус үчүгэй тэрээһин буолар. Быйылгы күрэспитигэр оскуолалар олус үчүгэйдик бэлэмнэнэн, тэринэн кытыннылар. Оҕолор ортолоругар тыйаатырга талаһыы күүстээх эбит. Үгүс талааны бэлиэтии көрөн үөрдүбүт».
Дьүүллүүр сүбэ чилиэнэ Мария Винокурова: «Патриотическай өй-санаа иитиллэригэр тыйаатыр суолтата улаханын бу күрэс өссө төгүл итэҕэттэ. Хас биирдии үлэ барыбытыгар дойдубут историятын, култууратын дириҥник өйдүүргэ, сыаналыырга уонна Аҕа дойдубут иһин эппиэтинэһи, киэн туттууну үөскэттэ».
Мария Аргунова «Мүрү саһарҕата»
