«БАРЫТА КЫАЙЫЫ ТУҺУГАР»

Алтынньы 22 күнүгэр Ылдьаа Нохуоккун аат. Чараҥ култууратын киинигэр быстах хомуурга ыҥырыллан Ийэ дойдуларын көмүскэһэ барбыт биир дойдулаахтарбытыгар, кинилэр дьиэ кэргэттэригэр көмө оҥороору «Барыта Кыайыы туһугар» аахсыйа кэнсиэрин оҥордубут.
Дьон үксэ дойдубутугар тыҥаан турар балаһыанньаны истэ-билэ сырыттар да сиһилии өйдөөбөтө үгүс. Сэһэн Ардьакыап аат. улуус историятын түмэлин үлэһитэ, историк, кыраайы үөрэтээччи А.П. Сивцев «Аан дойду политическай балаһыанньатын» туһунан нэһилиэк олохтоохторугар сырдатан кэпсээн тэрээһин суолтатын арыйда.
Ырыа — Ийэ дойдуга тапталы иҥэрэр, бэриниилээх буолууга сирдиир күүс. Аахсыйа кэнсиэркэ кыттыыны ыллылар: «Күбэйэ» ырыа бөлөҕө (сал. А. Свинобоева), Ылдьаа Нохуоккун аат. култуура киинин вокально-хоровой бөлөҕө (сал. Г. Свинобоев), «Уол бэрдэ» Мындааба ОО уолаттарын бөлөҕө (сал. А. Пантилова), В.Н. Мигалкин аат. Чараҥ ОО 3-4 кыл. үөрэнээччилэрин хора уонна учууталларын ырыа бөлөҕө (сал. Н. Свинобоева), биирдиилээн ырыаһыттар — Надежда Свинобоева, Даниил Атласов, Снежана Охлопкова, Былаас Сивцев өйү-санааны күүһүрдэр, дойдуга бэриниилээх буолуу тыыныгар кынаттыыр ырыаларын ыллаатылар. I Хоро нэһилиэгин олохтоохторугар нэһилиэк сэбиэтин бэрэссэдээтэлин солбуйааччы С.М. Бурцева, нэһилиэк бастакы баһылыга, үлэ бэтэрээнэ М.Д. Орлов маннык кэмҥэ олохтоохтору түмсүүлээх буоларга ыҥырдылар, уолаттарбыт этэҥҥэ, чэгиэн туруктаах дойдуларыгар, дьиэлэригэр-уоттарыгар эргиллэллэригэр баҕа санааларын эттилэр, алҕаатылар. Нэһилиэк олохтоохторо, тэрилтэлэрин үлэһиттэрэ «Барыта Кыайыы туһугар» аахсыйа кэнсиэркэ — 88 400 солк. кээмэйдээх көмөнү оҥорбуттарын иһитиннэрдилэр. Ол иһиттэн улуус пуондатыгар нэһилиэк тэрилтэлэрэ 56 900 солк. кыттыспыттарын уонна нэһилиэкпититтэн бэйэлэрэ тылланан барбыт Попов Сергей Егорович, Заровняев Эдуард Валентинович дьиэ кэргэттэригэр 31 500 солк. уу харчынан аат ааттан туттардылар.
«Кыайбыппыт! Кыайабыт! Кыайыахпыт!» тылларынан аахсыйа кэнсиэрэ өрө күүрүүлээхтик түмүктэннэ.