1969 с. ыччакка аналлаах «Юность» диэн уус-уран сурунаалга биэс зенитчицалар уонна кинилэр хамандыырдарын туһунан Борис Васильев «А зори здесь тихие…» сэһэнэ бэчээттэммитэ. 1972 с. сэтинньи 4 күнүгэр Максим Горькай аатынан киинэ устуудьуйатыгар Станислав Ростоцкай режиссердаан икки сиэрийэлээх киинэ уһуллан тахсан сэбиэскэй дойду үгүс дьонун дууһатын туппута, сүрэхтэрин ытаппыта. Ол курдук, бүтүн сэһэнтэн 180 мүн. толору метражтаах киинэ уһуллубута. Ыам ыйын 10 күнүгэр Күлүмнүүр аатынан Тойон Мүрү култуура дыбарыаһыгар режиссер Екатерина Свинобоева «А зори здесь тихие…» сэһэнтэн 8 мүнүүтэлээх инсценировканы сценарийдаан, «Манчаары» тыйатыраалынай устуудьуйатыгар туруоран, Бороҕон олохтоохторугар көрдөрдө. Бу кылгас кэмҥэ бүтүн сэһэни арыйар уустук суол, ол да буоллар уот-күөс (А. Сысолятин, М. Протопопов), муусука (В. Самсонов, С. Степанов), Семен Орлов саҥаны устуу көмөтүнэн көрөөччүгэ итэҕэтиилээхтик тиэртилэр.

Старшина Васков оруолугар Иван Окоемов биэс кэрэчээн кыргыттарын монологар ахтарын, кинилэри өлөр-өлүүттэн өрүһүйбэтэх сүрэҕин оспот бааһын, дууһатын кыланыытын көрбүт, истибит дьон ытамньыйан да ыллылар. Байыас зенитчицалар: Соня Гурвич – Сардаана Антипина, Лиза Бричкина – Наталья Портнягина, Женя Комелькова – Мария Андросова, Галя Четвертак – Алена Голикова, Рита Осянина – Екатерина Захарова оруолларыгар сөп түбэһэр кыргыттар талыллан, уобарастарын ылыннарыылаахтык арыйбыттара көрөөччүнү долгутта.

Кинилэр тыыннаахтарыгар кэпсэппит кэпсэтиилэрэ Васков ахтылҕаныгар ой дуораана буолан дуораһыйан иһиллибитэ айымньы трагедиятын биэрэн, туруоруу сүрүн соругун ситтэ. «Краткость – сестра таланта» диэн этиллэринии, кылгас инсценировка иһигэр сэрии алдьархайын, норуоппут Улуу Кыайыытын, айымны ис хоһоонун көрөөччү ылынарын курдук тиэрдии – дьоһун ситиһии.

Добавить комментарий

Ваш адрес email не будет опубликован. Обязательные поля помечены *