Ыам ыйын 9 күнэ. Улуу Кыайыы 77 сыла.

Ыам ыйын 9 күнүгэр сарсыардаттан нэһилиэк баһылыга Василий Бурцев тыыл бэтэрээннэрин уонна сэрии оҕолорун дьиэнэн сылдьан эҕэрдэлээтэ, бэлэхтэри туттарда. Бу маннык истиҥ сыһыантан кырдьаҕастар барахсаттар олус долгуйдулар, үөрдүлэр, хардатын махтанан хас биирдиилэрэ эдэр көлүөнэҕэ кэс тылларын анаатылар.

“Өспөт полк саллааттара” уонна Улуу Кыайыы 77 сылыгар аналлаах миитин буолан хас биирдии киһи сүрэҕэр чугас киһитин – Аҕа дойду улуу сэриитигэр кыттыбыт, Кыайыыны аҕалсыбыт уонна тыылга үлэлээн Кыайыыны уһансыбыт аҕатын, ийэтин, эһэтин, эбэтин, хос эһэтин, хос эбэтин, аймаҕын долгута санаттылар, сытыы ахтылҕан иэйиитин биллэрдилэр.

Быйылгы тэрээһин уратытынан олохтоох хоһоонньуттар «Кыайыылаах көлүөнэҕэ аныыбыт» диэн Кыайыы күнүгэр аналлаах бэйэлэрин хоһооннорун ааҕан иһитиннэриилэрэ буолла. Бу хоһооннорго кыайбыт көлүөнэ ытык дьонугар махтал, таптал тыллара ис сүрэхтэн этиллибиттэрин мустубут дьон чуумпуран туран иһиттэ.

Салгыы олохтоох култуура киинигэр блогер Аркадий Охлопков “Улуу Кыайыы 51 сыла” тус архыыбыттан устуутун көрдөрүү тэрилиннэ, истиҥ кэпсэтии таҕыста. Ол кэнниттэн оскуола спортивнай саалатыгар түөлбэнэн волейболга күрэхтэһии буолла. Спортсменнар Кыайыы күнүгэр аҕаларын, эһэлэрин хорсун быһыыларын холобур оҥостон кыайыыга эрэ дьулуһан, илин-кэлин түһүстүлэр. Түмүккэ “Түмсүү” түөлбэ – 1, “Туску” – 2, “Эрэл” – 3, “Сыһыы” – 4-с миэстэ буолары ситистилэр.

С.М. Бурцева