Муус устар 26 күнүгэр Ылдьаа Нохуоккун аатынан култуура киинигэр Саха АССӨ төрүттэммитэ 100 сылын, Саха сирэ Арассыыйа састаабыгар киирбитэ 390 сылын көрсө “Саха сирин кэҥэтиспит уус алданнар” I-кы Хоро нэһилиэгин үөрүүлээх тэрээһинэ ыытылынна.
“Аптаныамыйаны төрүттээбит чулуу дьоммут” Кулантай аатынан уран сурук түмэлин (сал. К.А. Крылова) кинигэнэн туруоруутунан саҕаланна. Уус Алдан улууһун дьаһалтатын аатыттан улуустааҕы култуура салалтатын солбуйааччы салайааччыта Е.С. Павлова, I-кы Хоро нэһилиэгин баһылыга В.В. Бурцев, “Сарыала” бөлөх (сал. С.Ф. Крылова) үҥкүүнэн, “Күбэйэ” (сал. А.Н. Свинобоева) ырыанан нэһилиэк олохтоохторун эҕэрдэлээтилэр.
“Кэм кэрдии үрдүк мындаатыгар” Сэһэн Ардьакыап аат. улуус историятын түмэлин бас салайааччыта Дь.М. Заболоцкай, сырдатааччыта А.П. Сивцев саҥа буосканан оҥоһуктарын билиһиннэрэн, “Сэһэн Ардьакыап ыраахтааҕы Екатерина II көрсүһүүтүн”, “Лөгөй Тойон уонна кини киһитэ Өнөкүй баай кыыһа Абакан Сүчү” историяларын сырдатан тэрээһини дириҥ ис хоһоонноотулар.
“Үйэлэри өтө көрбүт Лөгөй” култуура киинигэр үлэлиир “Манчаары” театралынай устуудьуйа (сал. Е.П. Свинобоева) кыттыылаахтара театрализованнай көстүүнү көрдөрдүлэр. Манна Саха сирин кэскилин кэҥэтиспит биир дойдулаахтарбыт мөссүөннэрэ – сахалар утары турууларын тохтотон саханы тыыннаах хаалларбыт Лөгөй Тойон, Москубаҕа үһүө буолан тиийэн ыраахтааҕы Федор Алексеевиһы көрсүбүт Лөгөй сиэнэ Чука Капчинов, “Сахалар тустарынан былааны” туппутунан ыраахтааҕы Екатерина II көрсүбүт Сэһэн Ардьакыап, “Сахалар Степной Думаларын“ төрүттээччитэ Иван Мигалкин, “Сахалар сойуустара” төрүттээччитэ В.В. Никифоров-Күлүмнүүр уонна Саха АССӨ төрүттээбит М.К. Аммосов, П.А. Ойуунускай, И.Н. Барахов тыыннаҕымсыйан көстөннөр умнуллубат үһүйээн арҕастарын туораттылар.
Саха АССӨ төрүттэммитэ 100 сылын көрсө ыытыллыбыт тэрээһин “Чараҥ добун оһуохайа” этээччилэр – А. Аргунов, Д. Бочкарев, К. Слепцов, Г. Свинобоев, Нь. Никитина, П. Охлопков үтүктэн, саха мааны үҥкүүтэ ыраахха диэри дьиэрэйдэ.