2022 сыл улууспутугар Дойдуга бэриниилээх буолуу сылынан биллэриллибитэ. Төрөөбүт дойдуга таптал – киһиэхэ оҕо эрдэхтэн иҥэриллэр. Төрөөбүт дойдутун таптыыр киһи өбүгэтин үгэһин, култууратын, тылын-өһүн, сиэрин-туомун өйүгэр-санаатыгар, этигэр-хааныгар, кутугар-сүрүгэр иҥэрэн улаатар уонна кэми-кэрдиини аахсыбакка ол туһугар туруулаһан үлэлиир-хамныыр, сүүрэр-көтөр. Нэһилиэкпит түөлбэлэрин олоҕун сэргэхситэ, үлэлэрин-хамнастарын сөргүтэ, өбүгэ үгэһин үйэтитэ таарыйа өбүгэлэрбит уол оҕону иитиигэ, үлэҕэ үөрэтэр ньымаларын, эти-сиини эрчийэр, өйү-санааны бөҕөргөтөр, тулууру тургутар оонньууларын «Өбүгэлэр оонньууларын» тэрийэн ыыттыбыт. Тэрээһини көҕүлээн салайсыбыт түөлбэ салайаачыларыгар М.В. Ябловскаяҕа, «Туску» (2 үрдэл), Т.А. Румянцеваҕа «Эрэл», Л.П. Гуляеваҕа «Сыһыы» (3 үрдэл), С.М. Бурцеваҕа «Түмсүү» (1 үрдэл) барҕа махталбытын тиэрдэбит. Уолаттарбыт тиэргэннэриттэн, олорор түөлбэлэриттэн саҕалаан туруулаһан, өрүү сэмэй өҥөлөрүн киллэрсэ сылдьыахтара диэн хайгыыбыт, эрэнэбит.