ОЙУУНУСКАЙ ЫҺЫАҔА — 85

1990 сыл балаҕан ыйын 27 күнүгэр — Саха өрөспүүбүлүкэбит судаарыстыбаннай суверенитет туһунан декларация ылыллыбыта. Декларация өрөспүүбүлүкэбит Россия Федерациятын тэҥ бырааптаах субъега буоларын биллэрбитэ, саҥа кэминээҕи сайдыытыгар улахан историческай суолталаах олугу уурбута.

Бу күн биһиги, ааспыт үйэлэргэ өрөспүүбүлүкэбит судаарыстыбаннаһа олохтонуутугар суолу тэлбит, саха норуотун туһугар өйдөрүн-санааларын уурбут, үлэлээбит-хамнаабыт дьоммут — Сэһэн Ардьакыап, Иван Емельянович Мигалкин, Василий Никифоров-Күлүмнүүр, Платон Ойуунускай, Максим Аммосов, Исидор Барахов, Степан Аржаков уо.д.а. ааттарын киэн тутта ааттыыбыт.

Быйыл улууспут, нэһилиэкпит историятын биир ураты суолталаах кэрчигэ — 1936 сыл балаҕан ыйын 10-13 күннэригэр биһиги нэһилиэкпитигэр ыытыллыбыт оройуон улахан ыһыаҕар саха сэбиэскэй литературатын төрүттээччи, бэйээт, суруйааччы, бөлүһүөк ПЛАТОН АЛЕКСЕЕВИЧ ОЙУУНУСКАЙ Саха АССР совнаркомун бэрэстэбиитэлин быһыытынан кэлэ сылдьыбыта 85 сылын туолла.