Бүгүн, от ыйын 6 күнүгэр 15 чаастан Кулантан музейын балаҕаныгар Өлүөхүмэ Аанньах Хочотугар ыытыллабыт ХIV ОЛОҤХО ЫҺЫАҔАР ситиһиилээхтик кыттан кэлбит Чараҥ бөһүөлэгиттэн төрүттээх биир дойдулаахтарыбытын кытта көрсүһүү буолан ааста!
Саха норуотун баай култууратын, төрүт үгэһин илдьэ сылдьар талба талааннарбыт норуот маастардара Пелагея Соловьева, Мичил Бурцев, чабырҕахсын Николай Бурцев төрөөбүт төрүт буордарыгар сүгүрүйэн, махтанан туран Аал уот иччитигэр айах туттулар уонна көрсүһүүгэ кэлбит Чараҥнарын дьонугар алгыстаах алаадьынан, сөрүүн быыппаҕынан күндүлээтилэр.
Дьэ уонна уос-номоҕор киирбит улууканнаах Олоҥхо Ыһыаҕар айаннарын, күрэхтэргэ кыттыыларын, ыалдьытымсах Өлүөхүмэ дьоно хайдах көрсүбүттэрин, атаарбыттарын туһунан сөҕө-махтайа кэпсээтилэр. Сылаас ытыстарын иһиттэн айан таһаарбыт уран оҥоһуктарын туһунан сиһилии кэпсээтилэр. Кэлбит дьон ыйытыыларыгар хоруйдаатылар.
Олохтоох дьаһалта, култуура тэрилтэлэрэ уонна доҕотторо, аймахтара киэн туттар дьонноругар махтал тылларын анаатылар, бэлэхтэрин туттардылар.
Ирэ-хоро кэпсэтии түмүгэр Хороттон төрүттээх уустары түмүү, кинилэр айар үлэлэригэр күүс-көмө буолуу, быыстапкалары тэрийии, үлэлэрин сырдатыы, төрөөбүт нэһилиэктэригэр анаан дьоһуннаах үлэлэри оҥоруу туһунан этиилэр киирдилэр.
Элбэх улахан тэрээһиннэргэ, ыһыахтарга сылдьыбыт ыалдьыттарбыт олохтоох дьоҥҥо анаан эһиил ыытыллыахтаах спортивнай оонньууларга анаан кэлэр ыалдьыттары көрсүүгэ Өлүөхүмэ улууһун холобуругар олоҕуран наадалаах сүбэлэри биэрдилэр.
Көрсүһүү киэһээтэ Олоҥхо ыһыаҕар анаммыт оһуокайынан, Кулантай музейын устун эскурциянан уонна өйдөбүнньүк хаартыскаҕа түһүүнэн түмүктэннэ!
Charan