Уус-Алдан улууһун Бастакы Хоро нэһилиэгэр муус устар 16 күнүгэр «Сайдыс» коллекционердар түмсүүлэрэ уонна Ылдьаа Нохуоккун аатынан Чараҥ сынньалаҥ киинин көҕүлээһининэн Сыл бэлиэтигэр анаммыт «Оҕус — саха киһитин эрэллээх доҕоро» сахалыы тыыннаах истиҥ-иһирэх кэпсэтиилээх тэрээһин буолан ааста.
Аан бастаан Көлүүр Оҕустаах Хоро оҕонньоро олоҥхону толорооччу Бурцев Афанасий Петровиһы сахалыы сиэринэн арыылаах алаадьынан күндүлээн көрүстүбүт. Хара ачыкылаах саха оҕуһун кытта хаартыскаҕа түстүбүт. Дьон сэргэ көлө оҕуһу көрбөтөҕө наһаа ырааппыт эбит. Онтон кулууппутугар киирэн Чараҥ коллекционердара муспут «Дэриэбинэ оҕустара» быыстапканы көрдүбүт. Онтон салгыы «Сэһэргэһии түһүһүлгэтигэр» Оҕустаах Улуу Хоро оҕонньоро ойуулаах нэһилиэкпит саҥа дьарылыгын кытта билистибит.
Кэлбит ыалдьыттар оҕус тиэмэтигэр иһитиннэриилэри оҥордулар. Ол курдук: «Ураа муостаах оҕустар араастара», «Сахаларга оҕус суолтата», «Оҕус саха худуоһунньуктарын үлэлэригэр» диэн тиэмэлэргэ дириҥ ис хоһоонноох кэпсэтии таҕыста.
Түмүккэ «Оҕус сиэппит оҕо сааспыт» диэн ахтыы чааһыгар урукку колхуос, совхуос үлэһиттэрэ, аҕа көлүөнэ дьон ахтыы оҥордулар.
Манна Оскуола оҕолоро сахалыы талах оонньуурун оҥорор маастар кылааһы көрөн олус аствннылар. Быыстапка кыттыылаахтарыгар ол талахтан оҥоһуллубут оҕус оонньуурдары бэлэхтээтибит. Оҕолор сыалҕалаах оҕуска хатааһылаан үөрүү-көтүү бөҕөтөө.
Ити курдук Саха оҕуһугар анаммыт тэрээһимит олус үчүгэйдик ааста, дьону долгутта. Кыттыбыт, тэрийбит Дьоҥҥо барҕа махтал буоллун.
Түгэнинэн туһанан Сахабыт сирин олохтоохторун саханы саха оҥорбут көлүүр оҕуһу туһаныахха, сөргүтүөххэ. Төрүт дьарыкпытын умнумуохха диэн ыҥырабын.
Анал ааттар:
1. Чараҥ бөһүөлэгэр 2021 сылга — оҕус сылыгар төрөөбүт «Бастакы оҕус ньирэй» анал аат туттураллар — саамай элбэх оҕус ньирэйдээх фермер Ябловская Мария Васильевна.
2. Айымньылаах үлэ сылыгар оҕус туһунан айымньы «Оҕус туһунан хоһоон» — Илья Михайлович Сергеев.
3. Айымньылаах үлэ сылыгар оҕус туһунан айымньы «Оҕус туһунан ырыа» — Михаил Конников.
4. Айымньылаах үлэ сылыгар оҕуска анаммыт илиинэн оҥоһук «Оҕус — уус-уран оҥоһук» — Альбина Николаевна Орлова.
5. «Дэриэбинэ оҕустара» быыстапкаҕа саамай элбэх араас экспонат аҕалбыт кыттааччыга «Оҕуһунан баай» анал аат туттарыллар — Айылҕан Алексеев Чараҥ ОО үөрэнээччитэ.
6. «Саха оҕуһун иитээччи-күрүөлээччи» анал аат туттарыллар Бурцева Афанасий Петрович.
7. «Дэриэбинэ оҕустара» быыстапкаҕа «Талах оонньуур оҥорор уус» анал аат туттарыллар Васильев Александр Семеновичка.
Махталы кытта Уус-Алдан улууһун 1-кы Хоро нэһилиэгиттэн, Чараҥтан Евдокия Окоемова.
Сынньалаҥ киин уус уран салайааччыта.
18.04.2021 с.
«ДЭРИЭБИНЭ ОҔУСТАРА» быыстапка. 200-тэн тахса оҕуска сыһыаннаах араас экспонаттары Чараҥ «Сайдыс» коллекцилнердар түмсүүлэрэ дьонтон түмэн аҕалан туруордудар.
Charan