2021 сылга Россияҕа — Билии уонна технология, Саха сиригэр — Доруобуйа, Уус-Аладан улууһугар — Сомоҕолоһуу уонна айымньылаах үлэ, Бастакы Хоро нэһилиэгэр — Тупсаран тутуу сылларыгар анаан Саха сиригэр норуот маастарын күнүгэр Чараҥмыт уран тарбахтаах кэрэ анардарын оҥоһуктары көрдөрөр иккис төгүлүн ыытыллар онлайн быыстапка-дьаарбаҥката буолан ааста.
Кыттааччылар: Чараҥ тэрилтэлэрин коллективтара, «Ситим» түмсүү, «ЧараҥArt» уруһуй куруһуога уонна нэһилиэкпит уһанар, иистэнэр айар-тутар талааннаах дьоно. Маны сэргэ «Россия мастеровая» акция кыттыылаахтара сахалыы бууктаах сонноох «Далбар» үҥкүү бөлөҕө.
Быыстапка арыллыытыгар Якутия мастеровая хаамсыыга кыттыбыт М.В. Ябловская, Х.П. Васильева, Р.И. Копырина, Е.М. Попова сахалыы бууктаах соннорун, симэхтэрин кэтэн хаамыынан көрдөрдүлэр. Нарын куоластаах Кристина Свинабоева ырыатынан, “Саһарҕа” оҕо үҥкүү ансаамбылын (сал.С.Ф.Крылова) солистара Марианна Скрыбыкина уонна Олег Находкин имигэс үнкүүлэринэн тэрээһини киэргэтэн биэрдилэр. Салҕыы, быыстапка кэмигэр кыттааччылар үлэлэрин туһунан кэпсээтилэр.
Быыстапканы билиһиннэриини инстаграм @cdnakhodkin аккаунун нөҥүө быһа биэриигэ таҕыста.
Барыта холбоон 155 оҥоһук, 16 кыттааччы үлэтин аҕалан туруорда:
1) «Төрүт үгэспит сиэринэн» сахалыы оҥоһуктар (оҕуруонан, кылтан-сиэлтэн, туостан, мастан, тимиртэн оҥоһуктар, кыбытыктаах кырадаһынтан тигиилэр, сахалыы таҥас-сап).
2) «Аныгы кэм мандара» баайыы, макраме, бисер, сутаж, кырадаһынтан тигиилэр о.д.а. араас көрүҥнэр.
3) «Тэлгэһэ уран көстүүтэ» (ландшафтный дизайн) — тэлгэһэни тупсарар уран оҥоһуктар, тутуулар, сибэкки иһиттэрэ, оту-маһы, сибэккини киэргэтэн симээн олордуу туһунан хаартысканан кэпсээн (инстаграмтан экраҥҥа таһааран көрдөрүөххэ сөп).
4) «Киистэ абылаҥа» масленнай кыраасканан уруһуйдаммыт хартыыналар (живопись).
Айар кут иэйиитин уустаан-ураннаан оҥорон таһаарар талааннаах дьоммут дьоҕурдарын сөҕө-махтайа сэргээн көрүҥ-истиҥ!