Сэтинньи 7 күнүгэр Кулантай аат. литэрэтиирэ түмэлигэр 1-кы Хоро нэһилиэгиттэн төрүттээх өбүгэбит үгэһин илдьэ сылдьар, тарҕатар СӨ норуотун маастардарын олохторун, үлэлэрин, ситиһиилэрин кытта билсиһэр «ҮГЭС. ИЭЙИИ. АЙЫМНЬЫ» тэрээһин буолла. Манна СӨ норуотун маастара, Арассыыйа худуоһунньуктарын сойууһун, декоративно-прикладной искусствотын сойууһун кыттыылааҕа, Мүрү нэһилиэгин, Уус Алдан улууһун ытык олохтооҕо, СӨ ытык бэтэрээнэ М.С. Атласова, СӨ норуотун маастара, СӨ үөрэҕириитин туйгуна, 1-кы Хоро нэһилиэгин ытык олохтооҕо, СӨ Дархан Ууһа В.П. Егоров, Уус Алдан улууһун уонна СӨ норуотун маастара Т.А. Крылов кыттыыны ылбыттара тэрээһин ис хоһоонун дириҥэттэ, киэргэттэ. Нэһилиэкпититтэн төрүттээх А.С. Свинобоева 1996 с. улууска бастакы норуот маастара буолбутун киэн тутта иһиттибит. 1-кы Хоро нэһилиэгэ бүгүҥҥү күҥҥэ 9 маастардаахпытынан үөрэбит, киэн туттабыт!
