Бастакы Хоро нэһилиэгин олохтоохторо — оҕолордуун, эдэрдиин-эмэнниин Улуу Кыайыы 80 сылын, Улуу Кыайыы 9 күнүн уруйдаан-айхаллаан, өрө көтөҕүүлээхтик көрүстүлэр.
Ыам ыйын 1 күнүттэн — 9 күнүгэр диэри «КЫАЙЫЫ ТҮННҮКТЭРЭ» аахсыйа
ыытылынна. «Кыайыы түннүктэрэ» аахсыйа – бу Аҕа дойду Улуу сэриитин кыттыылаахтарыгар уонна тыыл бэтэрээннэригэр махталбытын биллэрэр, өлбүттэр албан ааттарын кэриэстииргэ уонна сэбиэскэй норуот хорсун устуоруйатын эдэр көлүөнэҕэ тиэрдэргэ кыаҕы биэрэр. Аахсыйаҕа В.Н. Мигалкин аат. Чараҥ орто оскуолатын үөрэнээччилэрэ көхтөөх кыттыыны ыллылар.
Ыам ыйын 8 күнүгэр Тыыл, Үлэ бэтэрээннэригэр «УЛУУ КЫАЙЫЫ 80 СЫЛЫНАН» эҕэрдэ кэнсиэр, бырааһынньыктааҕы остуол тэрилиннэ. Халлаан хараҥарыыта киэһэ 20:00 чаастан Кыайыы болуоссатыгар “ӨЙДӨБҮЛ УОТА” Бүтүн Арассыыйатааҕы аахсыйаҕа кыттыһан биир дойдулаахтарбытын, биирдиилээн олохтоохтор чугас дьоннорун кэриэстээн чүмэчи уотун уматан ахта-санаан аастылар. Оҕолор “КЫАЙЫЫНЫ УҺАНСЫБЫТ ЭҺЭМ” диэн сэрии, тыыл кыттыылаахтарын туһунан ахтыы-кэпсээннэрэ, “УЛУУ КЫАЙЫЫГА АНЫЫБЫТ” Кыайыы ырыаларын толоруу, Кыайыыга анаммыт хоһооннору ааҕыыга нэһилиэк олохтоохторо биирдиилээн, бөлөҕүнэн, дьиэ кэргэнинэн, тэрилтэнэн, түмсүүнэн кыттыыны ылан өйдөбүнньүк киэһэтэ үрдүк таһымҥа ыытылынна.
Ыам ыйын 9 күнүгэр сарсыарда 08:30 м. Чараҥ бөһүөлэгэр киирии аартыгар турар Саха сирин үс бастакы Үлэ Дьоруойдарыттан биирдэстэрэ, Уус Алдан улууһун бастакы Үлэ Дьоруойа Д.Г. Бурцев искибиэригэр тоҕуоруһа мустан, 09:00 ч. “ӨСПӨТ ҮЙЭЛЭЭХ ПОЛК” нэһилиэк олохтоохторо Улуу Кыайыыны уһансыбыт дьоннорун мэтириэттэрин күөрэччи тутан, кинилэр аттыбытыгар буолалларын ситиһэн, сэлэлии хаамаан кэлэннэр, Кыайыы болуоссатыгар “УЛУУ КЫАЙЫЫ 80 СЫЛЫНАН” үөрүүлээх миитиҥҥэ, умуллубат уокка, өйдөбүнньүктэргэ веноктары, сибэкки дьөрбөтүн уурууга кыттыбыттара уонна Владимир Харитонов тылларыгар, Давид Тухманов музыкатыгар “ДЕНЬ ПОБЕДЫ” ырыаны нэһилиэк олохтоохторун күргүөмүнэн толоруунан түмүктэммитэ.
Бу күн «Улуу Кыайыы бэлиэлэрэ (символлара)» уонна «Нэһилиэк Аҕа дойду сэрии кэминээҕи историята» аудио биэриини WhatsApp меесенджер нөҥүө киэҥ араҥаҕа иһилиннэ.
