Музыканан кынаттаммыт олоҕум
(Александр Васильевич Гуляев ахтыыта)
Музыка – киһи дууһатын кыната. Сорох ардыгар судургу матыып бүтүн олоҕу уларытыан, инники суолу ыйыан сөп. Гуляев Александр Васильевич олоҕун суола аан бастаан истибит байаанын тыаһын кытта арахсыбаттыы ситимнэммитэ. Аармыйа сыллара, музыкальнай үөрэх, кулуупка үлэ – бу барыта кини олоҕун кэрэ кэрчиктэрэ. Ол эрээри ити барыта туохтан саҕаламмытай? Почтанан кэлбит кыракый «Восток» байаантан уонна музыкаҕа баҕаран туран бастакы матыыптары үөрэтииттэн…
Музыка алыптаах эйгэтигэр аан бастаан миэхэ аартыгы арыйбыт киһинэн – күндү убайым Ваня буолар. Кини Бороҕоннооҕу музыкальнай оскуолаҕа үөрэнэ сылдьан, почтанан анал сакаас оҥорон, кыракый эрээри тыаһа-ууһа чаҕаан «Восток» диэн байааны ылыммыта. Ол күнтэн ыла мин дууһам музыка аптаах иэйиитигэр ыллаттарбыта. Бастаан байааным аҥаар өттүгэр, тарбахтарым нэһиилэ тиийэр буолан, «Хаар-хаар хаачыргыыр», «Һыт-тыа, һыт-тыа сырдык күммүт» диэн оҕо саас уостан түспэт ырыаларын доҕуһуоллаан, музыка эйгэтигэр маҥнайгы хардыыларбын оҥорбутум.
Кэм-кэрдии ааһан истэҕин аайы, бу дьарыгым олоҕум арахсыспат аргыһа буолбута. Оскуолаҕа бииргэ үөрэммит табаарыһым Сивцев Сергейдыын күн аайы байаан талкыйан, истиҥник доҕордоһорбут. Убайбар ыаллыы олорор Егор Копырин, Иннокентий Кривошапкин курдук талааннаах дьон кэлэн байааҥҥа оонньуулларын көрөн, кинилэртэн үөрэнэн, улам-улам репертуарбыт кэҥээн, оонньуур матыыппыт эгэлгэтэ эбиллэн испитэ.
Аармыйа кытаанах сулууспатыгар да сылдьан байаантан арахсыбатаҕым. «Ленинскэй хоско» баар байааны тартахпына, саха уолаттара тула мустан, төрөөбүт дойдубут туһунан сахалыы ырыалары истиҥник ыллаан дуораһытарбыт. Постка туруордулар да, испэр кутуллан кэлэр хоһооннору суруйарым. Ол курдук, бүтүн блокноту толору хоһоонноох дойдубар эргиллэн кэлбитим. Ону табаарыһым Сергейгэ бэлэхтээбиппэр, киһим үөрэн-көтөн, биир хоһооммор матыып айан ырыа гынан иһитиннэрбитэ – ол этэ айар үлэ үрдүк үөрүүтэ.
Аармыйа кэккэтиттэн эргиллэн баран, икки сыл тухары байаан алыптаах эйгэтигэр умсугуйан туран 17-с №-дээх Өктөмнөөҕү орто идэлээх техническай училищеҕэ (СПТУ) үөрэммитим. Оччотооҕу кэмнэр бастыҥ маастардара – Светлана Александровна, Егор Ильич Неустроевтар уонна Алексей Кириллович Калининскай курдук талааннаах уһуйааччылар миэхэ идэм кистэлэҥнэрин арыйбыттара. Кинилэр көмөлөрүнэн «баянист-культорганизатор» диэн кэрэ идэни баһылаан, Чараҥ кулуубугар үлэбин саҕалаабытым.
Олох үөһүгэр сылдьан, кэлин совхозка, «Сельхозтехникаҕа» да үлэлээтэрбин, тапталлаах байааммын хаһан да илиибиттэн түһэрбэтэҕим – ол аата олоҕум тухары айар куппун ыһыктыбатаҕым диэн сыаналыыбын. Ханнык баҕар тэрээһин, үөрүүлээх бырааһынньык мин байааным тыаһа суох ааспата. Музыка – мин олоҕум аргыһа, дууһам иэйиитэ буолан, дьон-сэргэ ортотугар өрүү үөрүүнү эрэ түстүүр.
Миигин бу дьикти эйгэҕэ сирдээбит убайбар, кынат буолбут бииргэ үөрэммит доҕотторбор уонна сүбэ-ама буолбут учууталларбар муҥура суох махталым муоратын аныыбын.
Кэм-кэрдии ааһар, дьон уларыйар, ол эрээри ис сүрэхтэн тахсар ырыа-тойук хаһан да сүппэт. Гуляев Александр Васильевич убайа Ваня бэлэхтээбит «Восток» байааныттан саҕаламмыт музыкаҕа таптала олоҕун тухары арахсыспат аргыһа буолбут. Кини бүгүн кэннин эргийэн көрдөҕүнэ, музыка кинини элбэххэ үөрэппит, олоҕун киэргэппит, ыарахан түгэннэргэ күүс-көмө буолбут, үгүс үчүгэй дьону кытта көрсүһүннэрбит эбит. Аармыйа сылларын аргыһа, үлэ-хамнас үөрүүтэ, олоҕун дьоло-соргута – ити барыта кини байаанын алыптаах тыаһын кытта ситимнээх.
Бэлэмнээтэ: Екатерина Свинобоева
