Музыка – Ньургун Иванович Бурцев олоҕун сүрүн ис хоһооно, дууһатын кэрэ абылаҥа. Кини дьылҕата металлофон нарын тыаһыттан саҕаланан, байаан көмүс дорҕооннорунан салҕанан улахан айар суол буолан арыллар.
Бу сырдык айан төрүтүнэн аҕата, Иван Иванович Бурцев – Сэргэ Уйбаан «Тула» байааннарыттан таһаарар алыптаах матыыптара буолбуттар. Ол дьикти дорҕооннор Ньургун айар суолун бастакы кыымнара буолан, олоҕун устата иннигэр сырдык сулус буолан умайбыттара.
Ньургун Ивановий Бурцев оҕо сааһын истиҥ түгэннэриттэн саҕалаан, билиҥҥи кэмҥэ диэри байаанын санныттан араарбакка ааспыт олоҕун кэрэ кэмнэрин, айар үлэтин үөрүүлээх түгэннэрин, ситиһиилээх хаамыыларын уонна музыкаҕа муҥура суох тапталын туһунан 2022 сыллаахха суруйбут ахтыытыгар иһирэхтик сэһэргиир.
Мин музыка абылаҥар куустарбыт дьоллоох оҕо сааһым төрөөбүт дойдум айылҕатын кэрэ тыаһыттан саҕаламмыта. Оччолорго кыра оҕо эрдэхпиттэн, айылҕаттан бэриллибит өтө истэр дьоҕурдаах буолан, илиибиттэн металлафон диэн палочканан охсон тыаһатар оонньуурбун түһэрбэт этим. Ол кэрэ дорҕооннор мин кэскиллээх суолбун тэлбиттэрэ.
Аҕам, Бурцев Иван Иванович, музыканы өрө тутар, элбэх күрэхтэр кыттыылаахтара этэ. Кини икки тульскай байаана былыргы истиэнкэ үрдүгэр, быылга көмүллэн, бэйэлэрин кэмнэрин кэтэһэн туралларын өйдүүбүн. Биирдэ эмэ аллара түһэттэрэн, ол аптаах үнүстүрүмүөнү тыаһатар баҕам кыайан, бастакы хардыыларбын оҥорбутум: байааным басовай өттүн доҕуһуол гынан, металлафонум тыаһыгар холбоон дьикти матыыптары таһаарар буолбутум. Бастакы сыанаҕа тахсыым уонна дьон биһирэбилин ылыым итинтэн силистэммитэ.
Олоҕум суолугар Слепцов Семен диэн дэгиттэр талааннаах музыкант, профессионал баянист уонна мелодист киһи дьукаах олорбута мин дьылҕабар улахан оруолламмыта. Кини миигин чочуйан, музыка абылаҥар өссө дириҥник киллэрбитэ. Ол түмүгэр, 5-с кылаастан саҕалаан кэнсиэртэргэ ырыалары доҕуһуоллуур буолбутум. Музыкаҕа тардыһыым күүһүрэн, 7-с кылааска бэйэм баҕабынан Курбуһах интернат-оскуолатыгар киирэн, музыкальнай оскуоланы ситиһиилээхтик бүтэрбитим.
Ити күнтэн ыла байааммын сүкпүтүнэн айан суолугар туруммутум. 1998 сыллаахха Культпросвет училищеҕа үөрэнэн, идэтийбит музыкант буолбутум. Ол кэмтэн ыла элбэх ырыа айылынна, араас таһымнаах күрэхтэргэ, бэстибээллэргэ кыттан үрдүк ситиһиилэр тосхойдулар.
Билигин мин, Өлөөн улууһун «Илкит» этнокультурнай киинигэр айа-тута, музыка эйгэтигэр үлэлии сылдьабын. Кэлэр саҥа сылга олоҕум биир үбүлүөйдээх кэрдииһин – 50 сааспын туолабын. Бу бэлиэ кэммэр анаан бэйэм айбыт ырыаларбынан айар киэһэбин – творческай кэнсиэрбин бэлэмниибин.
Музыка – мин дууһам тыллыыта, олоҕум суолтата. Байааным барахсан өрүү аттыбар баар буолан, мин дьоллоохпун!
Ньургун Иванович Бурцев олоҕо – истэр тухары бүппэт кэрэ матыып, байаан тыаһынан киэркэйбит сэһэн. Кини муусукаҕа толору анаммыт, айар кукка уйаламмыт олоҕун суола 2024 сыллаахха быстан, айар үлэтин бүтэһик аккордара ой дуорааҥҥа дуораһыйан аастылар.
Өлөөн сиригэр, истиҥ-иһирэх дьон ортотугар үлэлиир-айар дьоло кини дьылҕатын ордук байыппыта. Ньургун Иванович хас биирдии айбыт ырыата, байаанын көмүс дорҕооно истээччилэрин сүрэҕэр өрүү тыыннаах буолуоҕа. Кини матыыптара кэлэр да кэмнэргэ дьон дууһатыгар уйаланан, олохторун киэргэтэ, сырдыкка-кэрэҕэ сирдиэхтэрэ.
«Музыка баар буолан – дууһам өрүү эдэр, санаам өрүү сырдык…», диэн кини бэйэтэ эппитин курдук, Ньургун Иванович сырдык мөссүөнэ биһиги өйбүтүгэр-санаабытыгар өрүү эдэр дьүһүнүнэн, чаҕылхай талаанынан уонна дууһатын кэрэтинэн хаалыаҕа.
Бэлэмнээтэ Екатерина Свинобоева