Ыам ыйын 12 үнүгэр Аҕа дойду Улуу сэриитин кыттыылааҕа, тыыл, үлэ бэтэрээнэ, Саха Өрөспүүбүлүкэтин тыатын хаһаайыстыбатын үтүөлээх үлэһитэ, Хоро нэһилиэгин, Уус Алдан улууһун ытык олохтооҕо Николай Алексеевич Орлов төрөөбүтэ 100 сылыгар аналлаах «Буойун. Салайааччы. Кыраайы үөрэтээччи» ахтыы киэһэтэ ыытылынна. Николай Алексеевич Орлов дириҥ билиилээх, саха киһитин сиэринэн Аан дойдуну, олоҕу-дьаһаҕы киэҥник анааран, үйэлэри өтө көрөн, дойдум, дьонум туһа диэн олоҕор салайтаран олорбут үтүө киһи. Кини олоҕус устата кэнчээри ыччакка хомуйан хаалларбыт баай нэһилиэстибэтэ, оҥорбут үлэтэ-хамнаһа күн бүгүҥҥэ диэри кини аатын ааттаталлар, ытыктабылы ылаллар. Дьиэтээҕи тус архыыбыттан тутта сылдьыбыт маллара, кэтэ сылдьыбыт таҥастара, олоҕун устата Хоро уонна 1-кы Хоро нэһилиэктэрин историятын үөрэтиигэ муспут матырыйааллара, хомуйбут ахтыылара көрдөрүүгэ турдулар. Ахтыы киэһэтигэр улуус, нэһилиэк салалтатыттан, бииргэ үлэлээбит, алтыспыт дьоно, аймахтара, оҕолоро, сиэннэрэ, хос сиэннэрэ кэлэннэр Николай Алексеевич сырдык олоҕун ахтан-санаан аастылар, истиҥник кэпсээтилэр.