Ахсынньы 5 күнүгэр Күлүмнүүр аат. улуус култууратын дыбарыаһыгар 47 төгүлүн ыытыллыбыт Өрөспүүбүлүкэтээҕи «Мүрү 2025» ырыа күрэҕэ буолан ааста. Быйылгы күрэх ырыа куттаах дьиэ кэргэҥҥэ — I Хоро нэһилиэгиттэн төрүттээх Саха АССР култууратын үтүөлээх үлэһитэ, Уус-Алдан улууһун, Новгород куорат уонна Мүрү нэһилиэгин бочуоттаах олохтооҕо, норуот маастара Аким Акимович Бурцев төрөөбүтэ 90 сылыгар уонна кини олоҕун аргыһа, СӨ култууратын туйгуна, Мүрү нэһилиэгин бочуоттаах олохтооҕо Мария Алексеевна Бурцева төрөөбүтэ 85 сылларыгар ананна. Күрэххэ Уус Алдан улууһун 8 нэһилиэгиттэн, Чурапчы, Мэҥэ Хаҥалас, Нам улуустарыттан 14 дуэт кыттыыны ыллылар. Биһиги нэһилиэкпититтэн Илья, Туйаара Румянцевтар кыттыыны ылан «Бастыҥ дебют», «Алтан кыл» айар устуудьуйа «Бастыҥ доҕуһуол» анал ааттарга тиксэн үрдүк ситиһиилэннибит.
